مو هيك الأمل فيك يابسام الملا

23 أغسطس, 2010

مو هيك الأمل فيك يابسام الملا

مفاجئة عارمة للجميع عندما سأل الخضرجي ابو مرزوق المنجد الجديد في حارة الضبع ابو شاكر ” من وين انت “

فقال له ” من الكسوة”

ولكن لم تكن الصفعة هنا بل كانت بأنه أحد “العواينية” لأبو كامل

جميل جدا ان تذكر الكسوة العريقة في مسلسل باب الحارة حيث انها من اقدم القرى من العهد الروماني

ولكن ليس من الجميل أبدا ان يكون “أبو شاكر .. عوايني”

الكسوة اليوم اصبحت من أجمل المدن في جنوب دمشق حيث اصبح عدد سكانها حوالي 145 ألف نسمة

واصبحت في الآونة الأخيرة منطقة ادارية للكثير من القرى والضيع التي حولها

والجدير ذكره بان منطقة الكسوة تضم أكثر من 22 منطقة وقرية وهي :

( مدينة الكسوة – المساكن العسكرية بالكسوة – المساكن العسكرية بالحرجلة – المساكن العسكرية بالدير علي – المساكن العسكرية بالدولاب – مساكن النازحين الغربية – مساكن النازحين الشرقية – مساكن النازحين بالحرجلة – الحرجلة – مرانة – المقيليبة – المعلية – وادي المعلية – الطيبة – خيارة دنون – الماجدية – الدير علي – جب الصفا – قارة – الحرجلة – العادلية – المطلة – خربة الشياب – زعبر – مرجانة – ام العواميد – السعادة – رسم زبيب )

وتضم الكثير من المعالم الاثرية كالساعة وجسر الكبري و الطاحون ووو

وتتسم بالشكل الحضاري بوجود المناطق الادارية الجديدة والجامعة السورية ووو

ومن منا ينسى محمل الحج الشامي الذي كان يخرج من الكسوة

ومن ينسى ايضا غوطة الكسوة التي كانت جزء لايتجزء من غوطة الشام

هل نسينا الاعوج الذي جف ايضا وجرت اليه المناطق السكنية

فقد كان الأحرى بالمخرج بسام الملا ان يذكر الكسوة بإنطلاق محمل الحج منها او باختباء الثوار في غوطتها

كنت متشوقا لأن يقول شغيل “ابو حاتم” عندما ارسله “خطوف رجلك عالكسوة وسآل عنه” انه ليس من الكسوة

على العموم المسلسل لم ينهي بعد ولا يمكننا الجزم

ولكن .. مو هيك الأمل فيك يابسام الملا …

كسوة.نت

التعليقات

  1. ابو خالد يعلق,

    يعني موتت ابو عصام وموتت ابو شهاب وموتت ابو ابراهيم وموتت ابراهيم والزعيم والادعشري وما حكينا شي
    بس تجي الشغلة وتهز اسم بلدنا هي ما بنقبلها منك
    يعني الشغلة بدها شوية خجل

  2. ميرفت يعلق,

    لك هي كبيرة يا بسام

  3. ميرفت يعلق,

    مو معقول يعني كنت قول من بلد ثانيه ولا مو عاجبينك الكساونه

  4. سعيد بعد العيد يعلق,

    كنت حابب باب الحارة كثير بس انته خربته يا بسام الملا
    وعيب عليك توصفحدا من الكسوة بهالوصف

  5. memo يعلق,

    لك يا باطل وياحسافة ويا أخس عليك وعلى عيلتك يابسام يا ابن الملا
    ال باب الحارة ال
    لك وزيادة عليك شباك
    يعني مالقيت غير الكسوة يا بسام لتعمل العوايني منها
    يا خوفي يكون هالعوايني من حارتك ويكونو اهل الكسوة معلمين عليك حتى عم تتبلانا
    بس اخس عليك والف اخس
    وانا بطالب باخدلنا بتارنا
    ودمتـــــــــــــــــــــــــــــــــم

  6. عبدالرحمن الصياد (أبوعابد) بن محمد عدنان يعلق,

    والله على رااااااااسي يا ميمو وكلامك مدوزن وعلى الأصلي وانا كنت حبو لبسام الملا وتابع اخبارو وكنت أعتبرو شخص مهم بهال البلد بس هلأ إتبينلي إنو واحد غير هيك يعني عنجد ما بيستاهل نقول اسمو كامل هووووون على موقع بلدنا يلي وصف أهلها بالعواينية روووووووووح تضرب يا ابن الملا

  7. كنان الصياد يعلق,

    والله العالم عنا بالشركة صاروووووا يخافو مني ويفكروني عوايني , على أساس إنو هالشغلة متوارثة عنا بالكسوة , يعني إذا أبو شاكر بقي عوايني لأخر حلقة بدها تكون مشكلة كبيرة يا بسام الملا , أو بتعمللنا جزء سادس يكون بطلو أبو شاكر وتغير صورتو من عوايني للفرنسيين لبطل سوري مع الثوار .
    بس منشوف شو لح يصير بأخر المسلسل و إلنا رجعا عالموضوع أكيد

  8. كسواني يعلق,

    والله يا شباب ما في دخان بلا نار

    ولومافي بالكسوة عواينية من وقت باب الحارة وحتى يومنا هاد ما كان انجابت سيرتنا بالعاطل

    يعني اذا ما نص الكسوة عواينية بكون اقل بشوي يعني حوالي الثلث تقريبا ههههههههههههههههههههه

  9. احمد ظريفه يعلق,

    الامر عادي جدا ولاداعي للوقف عنده يبقى روايه ولست هذه الروايه موثقه تاريخيا
    اما الامر الثاني متل ماكن بالكسوه حمايه لثوار كان فيها اناس يعملون ضد الثوار
    متل ماقال المتل كل بلد وفيها كفايتها
    الروايه لم تنتهي بعد

  10. ابو محمود يعلق,

    بقص ايدي اذا كنت كسواني يا كسواني بالتعليق رقم 8
    وانا بطلب من ادارة المو قع تتحقق انو اذا كان كسواني او لاء
    بجوز ساكن بالكسوة بس مابظنك كسواني
    الكساونة أكبر من هيك
    وعم ننتظر نهاية الجزء لنشوف
    لأنو مستحيل يكون كسواني من بيت المنجد …

  11. كنان الصياد يعلق,

    يا صاحب التعليق رقم 10 ليش معصب بأي مكان على وجه الأرض في لمنيح وفي العاطل والكسوة ما لح تكون حالة استثنائية

  12. زك زك الفهمان يعلق,

    بالفعل على اساس انك مخرج وبتعرف بالاخراج يا بسام الملا
    على اساس ابو ديبو بالسجن كيف طالعته بعراضة خاطر
    هههههههههههههههههههههههههههه
    قال مخرج قال

  13. ابو بلال يعلق,

    والله كنت مفكرو انو مخرج فهمان بس طلع بالعكس بس ما منقدر نسوي شي غير ننتظر حتى ينتهي الجزء

  14. حسام السكري يعلق,

    أااما أظن الموضوع بهالصورة 0000 يلي راح سأل عنه قال انو فعلا في واحد اسمه كذا000 بس لا تستبقو الأحداث بركي هوة منتحل شخصية هادا الشخص ويلي حابك الشغلة كلها أبو كامل00000المهم طولو بالكن لنشوف أفلام الكرتون (باب الحارة لآخرها)

  15. عبدالرحمن الصياد (أبوعابد) بن محمد عدنان يعلق,

    لو الدنيا صارت دمار .. لو الجبل عليّ انهار .. و لو صلبوني على الأشجار .. و لو حرقوني بالنار .. و لو عذبوني طوال النهار … و لو مزقو جسدي بالمنشار … ولو أجبروني على الانتحار .. أقول لهم كلمة باختصار .. و أنطقها بعزة و افتخار .. و أرددها ………بتكرار .. و أصرار .. سوري انا وكسواني الاصل لو مهما صار

  16. المدير العام يعلق,

    تم نشر المقال على سيريانيوز
    http://www.syria-news.com/readnews.php?sy_seq=120329
    يرجى التفاعل

  17. زهير النجار يعلق,

    dيا جماتعه ابوشاكر مو من الكسوة وبسام الملا اكبرمن يجعل العوايني من الكسوة طولو بالكم لاخر المسلسل لنشوف لو ين رح يوصل بعدين منقرر شو رح نعمل

  18. كنان الصياد يعلق,

    رقم قياسي بالتعاليق سواء بموقعنا أو بسيريا رووم , ونحنا أكييييييييد أخدين الموضوع مزح , وهاد دليل على نجاح باب الحارة بعالمنا العربي , مع انو مسلسلات كتيييييييير هي السنة نزلت ومواضيعها هادفة و أهمها ( ما ملكت أيمانكم , و وراء الشمس )
    بظنهم أهم من باب الحارة بكتيييييييييييير و أهم من العكيد وشبريتو وهالمساخر هي

  19. بنت الكسوة يعلق,

    مرحبا

    أنا براي لو حدا يوصل للمخرج ويسأله قبل نهاية المسلسل شو بدو يصير بالعوايني ؟؟
    لأتنه حاسة أنه رح بنساوي متل حلقة بقعة ضوء ونروح على بيته بعد نهاية المسلسل ….
    ونشوف ليش هيك ساوه ؟؟
    شو مالقى غير الكسوانة يطالعهن عواينية………

  20. كسواني وافتخر يعلق,

    طلعنا عواينية بزمناتنا نشالله مابعود ايام زمان اذا هيك \بس الكسوة خبتلون السلاح لباب الحارة حكو علينا بالحلو وبعدين نزعوها وسوونا عواينية سيدي كل واحد بيعرف حالو \\\صيادي\\\

  21. عبد الرزاق الخاوندي - مكة المكرمة يعلق,

    ياشباب الموضوع لا يستاهل كل هذه الضوجة ، الكسوة أكبر من هيك وأكبر من أي شخص ، وبعدين وين المشكلة إذا طلع عوايني ، هو مسلسل أولاً وأخيراً وليس تاريخ مسطر و برجع بقول الكسوة أكبر من هيك .
    خلينا نحمد الله على نعمة افتقدها أهل الشام نفسهم ، الحياة الأجتماعية بالكسوة ، معرفة الشباب بين بعضهم ومعرفة الكبار بعضهم لبعض والواحد منا مابيسكن بالبيت أسبوع واحد حتى يعرف كل جيرانه ، هذه الأمور نسيتها الشام من زمان ، ولك بيكفي الواحد منا لما يمشي بالشارع الرئيسي بيسلم على أكثر من 15 شخص بيعرفهم بينما إذا كنت بالشام (أو حتى بالمدن المحيطة كدوما وحرستا) بيضل ساكن بالحي أكثر من 10 سنين ولا تعرف منهم أحد وأسألوا مجرب …
    بعدين على أساس الكسوة كتير نظيفة ، خلي الطابق مستور ، أظن أن كل كسواني يقرأ هذا التعليق قد عرف تماماً ماأفكر به .

  22. كسواني يعلق,

    ابن مين هاد لنشوف مين ولادو بس اكيد من زعران الكسوة القدامى
    حاكم مالح يخلصو عم يورثو هالمصلحة لولادهن

  23. عبدالاله السلمان يعلق,

    بسام انتا ااااااااااااكيد اهل الكسوة معلمين عليك على شان هيك عملتون عوينية بس انا من الكويت عم اكتب لشوف شو راح يصير اذا ماصار رداعتبار لااهل الكسوة راح اخلي كل جريد الكويت والسعودية ودبي تكتب عنك وشوف ابن السلمان شو راح يسوي انطروني

  24. ابن البلد يعلق,

    هل من المعقول أن يكون مسلسل باب الحارة خمسة أجزاء أي 150 حلقة وكأننا أمام مسلسل تركي أو مكسيكي الهدف من حلقاته الاطالة بدون أحداث مهمة أو مؤثرة
    حيث أن أحداث هذا المسلسل يكفيه جزءان على الأكثر ولاحاجة لهذه الاطالة حيث أن الابطال الرئيسين في المسلسل مثل أبوعصام وأبو شهاب تم إلغاء أدوارهم بسبب عدم اتفاقهم مع المخرج على الاجر حيث أصبح أبو شهاب الزكرتي العكيد أبو جانتي سائق التكسي الانسر والدبور الذي يتحدى الحارة كلها أما أبو عصام الشهم أصبح الزعيم أبو الحسن في أهل الراية بسبب ذهاب جمال سليمان إلى مصر حيث الأجر الاكبر فقد حصل في حدائق الشيطان على 300 ألف دولار أي حوالي 14مليون ليرة سورية
    والممثلين في الادوار الاخرى يغيرهم ويبدلهم كما يشاء حيث يميت من يميت ومن يقتل فلا يموت كما حصل مع أبو جودت ومع أم جوزيف
    هل من المعقول ان يعود العريف نوري إلى عمله بعد أن تم طرده وأن تقف الشرطة مكتوفي الايدي وهم يرون زميلهم يقتل من قبل العكيد معتز ويهرب معتز بسهولة
    وأن يأتي الملازم نمر(السيد مأمون ) يتزوج فريال على أساس أنه ابن عمها وتكتب له البيت باسمه لانعرف ماهو أمام الحكومة الحقيقي ام المزيف على الرغم أن النمس تعرف عليه بسهولة هل عجزت فريال الماكرة عن معرفته وماهو ىالدور الذي أعطاه لوالده أبو محمود أدهم الملا هل هو تنفيعة
    والسهولة الكبيرة التي يستطيع رجال الغوطة وعلى رأسهم أبو حسن ومعتز مداهمة السجون وإخراج المساجين وإنقاذ أم جوزيف ولاندري من أين أتى هذا الدور
    هل عندكم أي تفسير لهذه المهازل وغيرها

  25. simooo يعلق,

    يعني يا أستاذ (بسام الملا ) هل من المعقول خمس أجزاء على هذا المسلسل كأنو مسلسل تركي ؟؟؟؟؟؟؟؟؟؟؟؟؟؟؟
    فوق هشي تجي تنزع صيت الكسوة ما هاد عشمي فيك روح ظبت يلي نزعتو

  26. الهام ياسين يعلق,

    بيضتها يا بسام الملا

  27. ابو العنين يعلق,

    ياتعليق رقم 8 هدول جدودك العواينيه مابئولو بي كل بيت في ببببببببب وانتو بلوووووووووو الكسوه من ايام باب الحاره

  28. ابو صطيف يعلق,

    1-الخطأ الأول : في الحلقة 24 :
    كان أبو غالب حالق ذقنه عندما باع بليلة إلى بدر ولكن عندما ضربه معتز “أبو العز” كانت ذقنه طويلة :
    وهذا تكرر في غالب الحلقات…..
    هذه غلطة كبيرة وغريبة كيف ما انتبه لها :

    لاحظوا الفرق

    2-الخطأ الثاني :

    من خلال متابعة للحلقة 11 من مسلسل باب الحارة
    وعند بداية الحلقة حيث كان ابو عصام يتجول في الحارة الى ان وصل الى بيته
    وبداء يتأمل بيته من الخارج
    ولاحظت ان الشارع الذي يقف فيه ابوعصام وهو شارع حقيقي من احدى الحواري وفي نهاية
    الشارع من خلف ابوعصام يوجد احد البيوت وبالبيت يوجد مكيف هواء من النوع الحديث من قطعتين موديل
    التسعينات

    والمقصود من موضوعي هذا هو للفت انتباه مخرج المسلسل الى الانتباه لمثل هذه الامور
    لان المسلسل في فترة الاربعينات او الخمسينات والمكيفات في فترة التسعينات
    وكان على المخرج الانتباه لمثل هذه الامور
    وقد وقع في التسلل هذه المرة
    في النهاية اقول ان المسلسل رائع جدا جدا وانا اتابعه بكل شغف
    تحية للعاملين به

    وهذه هي صورة اللقطة والمكيف ودائرة حمراء على المكيف

    3- الخطأ الثالث : في حلقة اليوم “25″ :عندما كان معتز وابو حاتم وعبدو بالقهوة كان هناك صوت أبو غالب وهو يبيع كعك ومعروك (وهذه كانت في رمضان فقط) .هذه غلطة كبيرة أيضا.

    4-الخطأ الرابع:شعر أبو عصام تحت الطربوش من الجوانب تجده كثيف ولكن عندما يخلع الطربوش ليضع باروكة الصلع تجده من الجوانب قليل .

    5- الخطأ الخامس : أبو عصام الحكيم شواربه أحيانا شايبة وأحيانا نص نص .

    6-الخطأ السادس:من أخطاء المخرج بسام الملا:أنه يركز على شخصيات معينة ثم يتركها مثل زهرة وزوجها وأبوخاطر والكثيييييييير.وأيضا يهمل بعض الشخصيات إهمالا مثل : سمعو وابن الادعشري والزبال فيجب علينا أن نرى ابنه وماذا حصل به بعد أن اعطاه الادعشري ليرة حلال .أيضا صلاة الفجر والعيد لم نراهم يصلوها

    7-الخطأ السابع : عندما عاد العقيد الى الحارة و علم بوضوع طلاق شقيقته سعاد من أبو عصام, كان يلومها و يقول أن الذنب ذنبها و أبو عصام لا يلام على هذا الفعل لانها قالت له (فشرت)
    و عندما ذهب أبو عصام ليبلغ العقيد بأمر وصول الاشارة, بدأ العقيد يلومه على فعله (طلاق سعاد) …
    أظن أن هناك تناقض كبير بين المشهدين!

    8- الخطأ الثامن :أحد الأخطاء الموجودة في الجزء الأول هو زهرة

    حيث كان يكلمها أحد بدون ما تنظر إليه و هي تفهم و ترد !!

    9-الخطأ التاسع : يوجد خطاء كبير اخر من المخرج
    الا تلاحظون عندما يحلق عصام الى

    اهل الحارة في المحل لا توجد ولا شعرة
    من الحلاقة على الارض

    10- الخطأ العاشر :
    خطأ اخر في احدي الحلقات يذهب ابو حاتم الى العقيد في البراكة وشعرة وشواربة اشيب ثم بعدها في مشهد اخر في القهوة يكون لون شعره وشواربة اسود خالص

    11-الخطأ 11 :

    أثناء المضاربة بين الحارتين كان أبوعصام يضحك وهو حامل العصاية .

    12-الخطأ 12 :
    عندما خرج سعيد زوج بوران من السجن وكان يأكل عند عائلة أبوعصام لم تكن دلال مغطية رأسها وكان سعيد يبصبص عليها.

    13- الخطأ 13 : الزعيم كان غني جدا وحتى عندما اعادوا تنظيم الحارة اشترى جميع الدكاكين التي لم يكون لها سند ملك فاين ذهب هذا الورث؟ وكيف تعيش فريال ولطفية على الاعانة من صندوق الحارة؟
    14- الخطأ 14 : وهي لما كانوا نسوان الحارة بدهم يروحوا لـ سعاد
    راحت ام خاطر لتستأذن من زوجها “ابو خاطر”
    وفي هذا الوقت طلب ابو خاطر من زوجته ان تأخذ ابنتهم خيريه معها وعدم تركها لوحدها في المنزل.
    ووافقت أم خاطر
    ولكن في المشهد الذي بعده عندما كانو نسوان الحارة مع سعاد لم تكن خيرية معهم.
    15-الخطأ 15 :عندما ذهب الحكيم ابو عصام الى فريال ليرد ابنتها , لم تكن مغطيه على رأسها ومتحجبه واظهرت وجهها مع العلم انها محرمة عليه .

    16-الخطأ 16 :كيف لما راحو حارة الضبع يجيبوا السلاح من أبو النار ما لاحظوا الاختلاف بين الأسلحة والقمح من ناحية الوزن والثقل والملمس.
    17- الخطأ 17 : في الحلقة 27 : عندما دخلو الدرك الحارة رفسوا الطاولة الصغيرة ووقع ابريق الشاي و انكسر لكن لما رجعوا رجال الحارة كان كل شي في مكانه و الابريق ما كان مكسور.

    18-الخطأ 18 شباب لو تلاحظو شوراب ابو بشير كبار نوعا ما ومتلاصقات ببعض
    اما في الحلقه 27 لما كان ابو بشير يحكي مع العقيد ابو شهاب كانوا شواربو بعاد عن بعض وكان بنص شواربه فاضي ما في شوارب ومبّين انو شوارب اصطناعية.19- الخطأ 19:في الحلقة 24 أول مشهد لعصام في المعركة كان باب المحرس مقفل ثم رأيناه مفتوح

    20- الخطأ 20 : هناك خطأ فادح … فالشّيخ عبد العليم ( كثير الغيبة ) …مثلا : لما انفضح أبو عصام , و أخذوا منه صندوق مال الحارة …اجتمع ( كبارية الحارة ) في بيت أبو قاسم …و لما انتهوا من الاجتماع ,,,خرجوا و وقفوا على باب منزل أبو جاسم , و بدؤوا الحديث عن مساوئه (يستغيبونه)فجاء الشّيخ و لم ينهرهم , بل شاركهم الغيبة و هذا حرام في الإسلام

  29. ابو صطيف يعلق,

    متل هيك مخرج لا تعتبو عليه

  30. ابو غرام يعلق,

    والله عيب يابسام مفكر كل الناس متلك ومتل ال…………… بتئيم لي فيها بتحطو فيك

  31. ابو غرام يعلق,

    اهلين شباب انا رئيه من رئي ظريفه

  32. ابو غرام يعلق,

    وها الملا واحد عوايني كذاب على ما يبدو عمليلو شي اهل الكسوه وكاسرين عينو

  33. سنفور معارض يعلق,

    اي طول بالك …. هي مدري كم واحد من المسلسل من الشام وغيرها طلعو عواينية ..وماحد آم وعمل مظاهرة !!

    مو حرزانة الشغلة

  34. saaree يعلق,

    أ أأنا رأي متل رأي ابو غرام

  35. عبد المنعم الصياد / سعودية يعلق,

    اللام عليكم ….

    ان تعليقاتكم ماهي الا دليل على وعي والمشاهد
    انتوا عطيتوا الموضوع اكبر ما بيستاهل

    كل عام وانتم بخير

    تقبلوا فائق الاحترام والتقدير

  36. أهل البيدر يعلق,

    يااااااااااا أهالي الكسوة الكرااااام
    ببشركم انو البحث جاري عن اصول عيلة ابو شاكر(يعني منجد باب الحارة)
    تبين انو هو مو من اهالي الكسوة الاصليين بل هو من القرى المجاورة للكسوة
    بس ابو دياب الملقب ابو كاعود هوا من الكساونة الاصليين اللي معدنهم ذهب
    وخلصونا عاد لاتعملوها زعلة .:………………………………..

  37. كنان الصياد يعلق,

    أناااااااااااااااا معك مليووووووون بالمية يا عبد المنعم , الموضوع مابســـــتاهل نشغل بالنا فيه

  38. صخر يعلق,

    كسواني العز ةالله العز بيلبقلك ما عاش اللي يجيب سيرتنا بالعاطل